La Usc di Ladins

Al ê le 1946 canche Erich Kostner metô sö tl hotel Casannova da Calfosch, adöm cun n grup de apascioná de schi, le Sci Club Ladinia. Al ê na sozieté che unî i sciadus dl post y tosc gnôl ince organisé gares, che ê tl pröm plülere ma ocajiuns por sté deboriada y por se devertí. Dl 1947 é spo le Sci Club gnü tut sö dala FISI (Federaziun Taliana di Sporc da d'Invern, ndr) y an á metü man da mëte da jí ince gares nazionales. Le Sci Club Ladinia á bele da impröma insö dagnora orü jí sura le campanilism fora, tolon ite atlec y atletes da düc i paisc dl'alta Val Badia y, por se identifiché damí cun la localité, él gnü dan trëi agn baraté inom. Insciö é le Sci Club Ladinia deventé Ski Team Alta Badia, n'assoziaziun che se deura tres deplü a n monn che müda, a esigënzes nöies, por ti jí incuntra ai atlec, ai sportifs y ala jënt dl post, ti pitan de vigni sort de ativités sportives ai mituns, ti ston dlungia a chi che ó jí dl vers de na cariera agonistica, mo ince a chi che ó gní alenadú o maester de schi. Le Ski Team Alta Badia mët insciö da jí tröpes colaboraziuns cun d'atres uniuns dal sport, cun les scores y cun les universités, se meton dant obietifs ambiziusc, che tol ite ince la formaziun profescionala, cherian oportunités da lauré - tres le sport - tla munt, sides d'invern co d'isté.

Ala fin de na sajun particolara, che s'á desfiré danter stlütes y restriziuns, unse incunté le presidënt dl Ski Team Alta Badia, Stefan Thaler, che nes á cunté deplü te na intervista che i podëis lí tla ediziun stampada d'La Usc da indoman, vëndres ai 16 de aurí.   (kp)