La Usc di Ladins

En mertesc ai 4 de ma él garaté na picia festa dan le Comun da Corvara por rengrazié y tó comié da Giancarlo Ferrari, che é sté tecnich de comun por bëgn 40 agn alalungia, dal 1980 incá. L'ombolt, le secreter, deplü assessurs y aconsiadus y i colaboradus dl comun da Corvara se á abiné por rengrazié le tecnich por ci che al á fat tratan düc chisc agn de sorvisc. Al é gnü tenü sö n pice buffet y al ti é gnü fat na viva.

Giancarlo Ferrari é nasciü a Balsan y chersciü sö a Siebeneich. Di agn Otanta s'ál trasferí ia en Gherdëna, a Santa Cristina, olache al á metü sö familia, olache al vir y á so stüde privat. Por 23 agn alalungia é Ferrari ince sté tecnich dl Comun de Badia y tl Comun de Sëlva ál lauré 26 agn, cina de setëmber dl ann passé. »Tratan düc chisc agn de sorvisc ái odü n gran frabicamënt y cambiamënt. Datrai él bunamënter ince gnü fat sö n pü' de massa, mo dantadöt chi agn êl na gran vëia da costruí y da ingrandí, ince por mirit dl turism. Ara ne jô nia cis da archité sö chësc fenomen, ince deache la lege urbanista le conzedô«, dij le tecnich, che á tut la dezijiun da se trá zourch canche al é gnü fora la lege urbanstica nöia. Ince sce al é en ponsiun laora inant Ferrari te so stüde privat: »La mënt ne pó nia sté frëma y á debojëgn da lauré inant«, stlüjel jö.

Le sostitut de Ferrari é al momënt Marco De Simone. Al é bele gnü scrit fora n concurs por chirí n tecnich por le Comun da Corvara, concurs che é preodü por i 17 de ma.  (kp)