La Usc di Ladins

Al é gnü baié de clima y ambiënt, de economia y turism, de sostenibilité, de sanité y de bëgnsté en mertesc sëra tratan le cërtl de discusciun invié ia tl zënzter Sajun a La Ila dal Consëi de Formaziun dl Comun de Badia. Adöm cun Judith Hafner dla »Rëi por la Sostenibilité de Südtirol« y cun la assessuria al turism Elide Mussner, él gnü traté deplü argomënc en relaziun ai 17 obietifs che les Naziuns Unides á metü ite tla Ajënda 2030 por le Svilup Sostenibl, n program che é gnü sotescrit dl 2015 dai 193 Stac che fej pert dl'Onu. Chisc 17 obietifs é traverc importanc por le dagní dla porsona y de nosta Tera y tol ite danterater le mudamënt dl clima, n consum y na produziun plü responsabli, cités y comunités plü sostenibles, energies y eghes plü nëtes, parité danter ëi y ëres, pesc y iustizia por düc.

N cërtl de discusciun
La »Rëi por la Sostenibilité de Südtirol« se tol dant da fá conësce a döta la Provinzia i 17 obietifs de svilup sostenibl, tiran ite uniuns y assoziaziuns, meton da jí proiec y iniziatives por fá crësce te nosc raiun l'impëgn tl ambit dl sozial y por le svilup de na economia y de n turism plü sostenibli. Tratan le cërtl de discusciun á la responsabla dl proiet, Judith Hafner, porté ite n valgügn impulsc y argomënc sön chi che al é spo gnü baié. I presënc á podü dí süa minunga, fá domandes, presenté critiches y propostes. En particolar án orü se archité sön trëi di 17 punc: le punt numer 3 »Sanité y bëgnsté« é dala gran pert araté un di plü importanc, deache ma sce an á la sanité pón se dé da fá por arjunje i atri traverc. Le numer 13 »Mudamënt dl clima« é n ater punt che vëgn reconesciü anter chi che an dess se tó a cör, deache les conseguënzes se lascia bele adintëne tres catastrofes naturales che gauja de gran danns ala umanité y a nosc planët. Le terzo punt che é gnü alzé fora tratan le cërtl de discusciun é le numer 12 »Produziun y consum sostenibli«, obietif che i podun düc porvé da arjunje meton averda a ci y co che i cumprun ite. I obietifs numer 4 »Istruziun de cualité«, 5 »Parité danter ëi y ëres«, 7 »Energia plü nëta« y 11 »Cités y comunités sostenibles« é i atri punc sön chi che al é gnü baié tratan le cërtl. I ún la fortüna da vire te n gran bëgnester y gonot stentunse da renunzié. Mo ince dí de no a de pices cosses pó ester n pröm vare por ajunje n travert plü gran.

Düc adöm, n vare al iade
Chëra de Badia é öna dles 48 incuntades che la »Rëi por la sostenibilité de Südtirol« á metü y mët da jí te döta la provinzia. I temesc tratá atoca düc nos, porchël messunse y podunse mëte man da se dé jö impara, dai conësce y da porvé da capí co che i podun instësc contribuí – ince ma cun pices cosses, n vare al iade – al dagní de nosc planët. »Dí de no ai Mondiai é sté n at de coraje da pert dl Comun de Badia, che desmostra la orenté da jí dl vers de n turism plü sostenibl«, á alzé fora tlafinada Judith Hafner. Turism y sostenibilité é döes realtés che pó y che mëss jí deboriada, ince magari cun val' renunzia, mo por le bëgn plü gran, le dagní de nosta Uma Tera. Por plü informaziuns sön la »Rëi de Sostenibilité de Südtirol« pon vijité la plata internet www.future.bz.   (kp)