La Usc di Ladins

Le mëis d’otober é sté n mëis dër important por la vita de dlijia te nosta Diozeja, deache al é gnü tigní les lîtes di Consëis de Cöra nüs. N terminn che an aspetâ cun intan de trica; tröpes cöres á messü sintí sön süa pel che ara n’é nia plü tan saurida da ciafé candidates y candidac che se mëtes a desposiziun.... y chësc te n ciamp sostanzial por la vita de paisc, olache les mans di fedei ó ester plü che mai. I proi vëgn tres demanco, porchël dess y mëss i laics surantó tres deplü.
La lîta di Consëis de Ploania é stada ofizialmënter ai 24 de otober. Da se ciaré jö les cöres bele ma tla Val Badia capëscion che ara é gnüda tignida te manires scialdi desvalies. La buna noela damperfora: te vigni ploania dla Valada arán inant n Consëi de Cöra che fistidiará da organisé la vita de dlijia, ci che é bëgn l’aspet plü important. Nia indlunch n’él indere sté saurí da le mëte adöm. Deplü ploanies é jüdes ala chirida de candidac tres na prelîta, te d’atres án chirí la colaboraziun dles uniuns de dlijia che é gnüdes inviades da mené n deleghé (uniuns di ëi, ëres, jogn, senior cor, musiga, etc.), altró él gnü damané jënt a usc, alüsc él gnü invié sön la plata dla cöra da se mëte a desposiziun. "No" é na parora che an á aldí scialdi gonot. Y chësc spliga spo ince ciodí che an á sciafié da tigní na dërta lîta ma te cin’ ploanies sön 12.

T’La Usc di Ladins di 5 de novëmber podëise lí plü avisa te ci ploanies che an á lité y co che ara é jüda tles atres.  (pablo)