Ince sce al é rové adalech de manco sciori respet ai agn da denant, s'ál formé de gran codes – en particolar pro i lifc prinzipai – liades ales restriziuns y ales mosöres cuntra le Covid. Codes che an á porvé da limité, mo che an n'á nia podü tigní fora. I n'un baié cun le responsabl di ofizi schipas dl'Alta Badia, Christian Dorigo
Tratan les vacanzes da Nadé y Nanü él sté sön i lifc dl'Alta Badia za. le 15% de sciori de manco respet al 2020. Mo impó s'ál formé de gran codes, en particolar pro i lifc de Piz La Ila y Piz Sorega, implanc prinzipai da chi che düc mëss pié ia por rové sö alalt. Iaissö se despartî spo la jënt y al n'ê pro i atri lifc – dantadöt chi daverc olache al n'é nia limitaziuns – nia plü tan da aspeté. Les fotos dles codes á ince metü man da zircolé sön internet, adöm cun les lamentanzes. Sambëgn n'êl nia saurí en chësc ann da evité codes y tëmps de speta, savon danfora che i lifc stlüc ess podü gní implis ma al 80%. Y sce al n'ê – danterater – de chi che capî y che aspetâ zenza baudié, é les lamentanzes
stades valgamia tröpes, nes dij le responsabl di ofizi schipas dl'Alta Badia, Chrstian Dorigo: »Chësc ann savônse bele danfora che al s'ess formé codes jödapé di lifc prinzipai y pro i ofizi schipas. I s'ún arjigné cun la venüda di schipasc online – da jí a tó ti box aposta metüs fora dan i ofizi – y tolon sö personal por dé informaziuns y garantí che al gniss respeté destanzes y regoles. I ún ince metü sö stanges por limité i amudlamënc, mo chëstes n'á gnanca dagnora jové, deache al é rové adalerch tröpa jënt, ince sce al é sté feter le 15% de manco cina sëgn.« Tres le sistem inovatif de control dl Green Pass y l'aplicaziun liada al schipas, éra jüda da daurí i lifc y da pormëte ala jënt da jí cui schi. N sistem che á albü val' dificolté da pié ia, mo che á spo funzioné dër bun, dij Christian: »Tl mëteman unse albü n valgügn problems tecnics cun l'aplicaziun, mo ai é tosc gnüs desgropá tres mioramënc y ajornamënc.«
Plü laur ti ofiziGran é sté iniann le laur di colaboradus di ofizi schipas, por ti sté do ales tröpes novités portades ite por afronté la pandemia. »Vëne n schipas ales condiziuns dades dant al momënt se damana plü tëmp, i dac mëss gní metüs ite dër avisa, por che ai stimenëies cun chi che é sön le Green Pass, y implü él da ti splighé a vigni scior co adoré la aplicaziun – dij Christian che ajunta: »Porchël sunse impó stá bugn da limité les codes dan i ofizi y al é da dí che al n'é sté dër tröc che á cumpré le schipas online.« Le gran gröm de sciori se n'é jüs cun i 8 de jená y al momënt é la situaziun sön les pistes plü calma, aspetan che al vëgnes forá.
(kp)
