La Usc di Ladins

“Wellenbrecher. Impresciuns fora dla staziun Covid” é le titul dla incuntada cun le fotograf y video­maker Andrea Pizzini, metüda da jí dal Consëi de Formaziun dl comun de Badia. Da feter dui agn incá viunse na pandemia che á atoché döt le monn. Le Covid é gnü fora de n sarëgn y nes á stlüt daite, limité y tut la liberté. Al nes á fat sofrí. Al á copé. Tlafinada ál ince ciamó despartí la sozieté, les families. Y ince te chësc momënt, olache al pê plü debl, nes condi­zionëiel ciamó. Da n ann incá él gnü fora les variores, che nes scona dales infeziuns, che nes dëida da evité les conseguënzes plü stersces, les cures te ospedal y la terapia intensiva. Deache la terapia intensiva é la ultima poscibilité por n amaré de Covid: chiló pol varí, mo chiló pol ince morí.

De dezëmber dl 2020 é Andrea Pizzini, fotograf y videomaker da Salurn, rové le pröm iade te terapia intensiva. Nia sciöche paziënt. Na süa compagna, infermiera, ti â cunté de jënt che ne crëi nia al virus, jënt che atacâ doturs y infermiers, che se proa indere dassënn por daidé i amará de Covid. Insciö á Pizzini metü man da filmé, fotografé y documenté ci che sozed tles terapies intensives, por lascé odëi – ince ai plü scetics – che le virus é y ci conseguënzes che na infeziun pó avëi. Pizzini á te chisc mëisc publiché tres indô videos y fotos de infermiers y doturs, de paziënc y de parënc, deache iadô na porsona che patësc él ince na familia y porsones che ti ó bun. Pert de chëstes imajes á Pizzini lascé odëi tratan la serada, a chëra che al á ince tut pert Verena Moling y Tobias Ploner, infermiers che laora tla terapia intensiva dl ospedal da Balsan y che é da odëi ti videos. Verena y Tobias á cunté de sciöche ara é da lauré te ospedal tratan na pan­demia, dla dificolté da messëi afronté la mort, y dla ligrëza da odëi paziënc che varësc. Chëstes impre­sciuns é y resterá inant ti pinsiers y ti recorc de düc chi che s’á tan dé da fá por salvé porsones y vites.

Porsones atempades, mo ince jones él rové tratan chisc mëisc te terapia intensiva. Tröc é varis. Mo nia düc. Ince sce le numer de paziënc che röia te ospedal por Covid é por fortüna jü zoruch, n’él tres ciamó che mëss gní curá te spitol. Gran pert de chisc n’é nia vaziná. Le laur de Pizzini vá porchël inant, ince tres chësta ona. I videos y les fotos publichëiel sön süa plata Facebook »Wellen­brecher« y le resultat de döt so laur sará spo n film, »Oxygen«, che podess bele gní fora anter la fin de chësc ann.   (kp)