En chësc ann complësc le Skicarosello 75 agn. Adöm cun le presidënt Andy Varallo ti sunse jüs do ala storia dl consorz, ales tapes plü significatives y importantes; i ún baié dles desfides da afronté y de ci che an se aspeta por le dagní di lifc
Al ê le 24 de dezëmber dl 1947 canche al gnô inaguré le pröm lift da scagns colaudé dla Talia: le Col Alt. N lift che n'á nia ma dé vita a un di raiuns da jí cui schi plü renomá dl monn, mo che á ince dé na sbürla al svilup dl turism tl'Alta Badia. Cun materiai scëmpli, sciöche lignan, banda y atri resć de ciars armá y le motor de n tractor, á Erich Kostner, adöm danterater ince cun Ernesto Costa che fajô inlaôta le feur, fat sö n lift da scagns che â na portada orara de 163 porsones – cuntra les 2.800 d'aldedaincö – y che â 17 menüc da rové sönsom (aldedaincö röia sö le lift de Col Alt te za. 4 menüc, ndr). Chël lift ê por Erich Kostner ma n mëteman, le pröm vare por valch de maiú. I agn dedô se slariâl
fora cuntra Ciaulunch y fajô sö dl 1953 le lift Capanna Nera, spo l'implant Crëp de Munt y dl 1957 dui lifc sön Pralongiá. Le raiun chersciô y i lifc metô man da colié i paisc dl'Alta Badia. Di agn '70 á spo Kostner fat sö i lifc de Boé y Costoratta, cherian n coliamënt cun les valades dlungia, coliamënt che é spo gnü ciamó plü concret dl 1974, canche al é nasciü le Superski: cun öna na cherta podôn sëgn jí cui schi te dötes les vals incër le Sela y ince te Ampëz y sön Plan de Corones. Le turism se slariâ fora y ti paisc chersciô la motivaziun y la vöia da lauré cun i sciori. Cun la gara de Copa dl Monn, organisada le pröm iade a La Ila dl 1985, s'á spo l'Alta Badia lascé odëi ince a livel internazional, cherdan adalerch n gröm de sciori da döt le monn. Erich Kostner é sté a ce dl Skicarosello cina dl 2006; la dezijiun da se trá zoruch ál comuniché en ocajiun dla inauguraziun dl lift nü de Col Alt, passan le testemone a so nu, Andy Varallo, che laurâ tl Skicarosello dal 2004 incá y che á spo surantut la presidënza dl 2017.
En ocajiun di 75 agn dl consorz di lifc unse orü ti jí do ala storia, ai momënc plü importanc, adöm cun le presidënt, che nes á cunté dl passé, dl presënt y dantadöt dl dagní dl Skicarosello.
L'intervista podëise lí incö, vëndres ai 11 de forá, tla ediziun stampada d'La Usc di Ladins.
