La Usc di Ladins

En lönesc, ai 28 de forá, é i Stödafüch da Corvara gnüs cherdá por dui intervënc. Da doman á pié füch n auto tla plaza da parché sön Planac: »N laurant che gnô da Fodom fora s'á intenü che l'auto metô man da fomé, al s'á archité adora assá, denanco le motor piass füch y borjass jö«, nes dij le comandant di Stödafüch da Corvara Helmut Thaler. Rová söle post é i omi di stödafüch tosc stá bugn da destodé les flames.

Golf carts vardüs jö
Dales cin' domisdé é spo i volontars ciamó n iade gnüs cherdá, por via de n gran föm fosch che gnô fora dl magazin dla sozieté di lifc Skicarosello tla zona industriala da Corvara. Te chësc magazin êl i golf carts dl Golf Club Alta Badia. Dl föm se á intenü le vize comandant che laora iló dlungia. Al á atira informé la zentrala da Balsan, che á mené fora le livel de alarm 2, cherdan adalerch, adöm cun i Stödfüch da Corvara, ince chi da Calfosch y da La Ila. »Da ot agn incá unse te chël magazin nüsc carts. Ara se trata de pici auti eletrics cun patris particolares che se mantëgn cun n sistem de autociariamënt, che se taca ite y se destaca da su«, nes spliga le diretur dl Golf Club Alta Badia, Claudio Tiezza, che dij spo inant: »I jun vigni döes edemes a controlé i auti y le status dles patris y cina sëgn ne êl mai sozedü nia. Bunamënter él sté na tiza eletrica che á fat pié ia döt cant. Te magazin êl indöt nü auti, de chisc s'á salvé un su. Le dann economich é scialdi gran, deache le cost di carts é de 5.000 euro l'un«, ajunta Tiezza. Por i Stödafüch n'él nia sté saurí da ti rové pormez ales flames a gauja dl föm fosch y toch che ne lasciâ nia odëi olache al ê la coa. »N iade che i ún ciafé fora la coa - spiga le comandant Helmut Thaler – éra tosc jüda da destodé jö les flames y da desfridé cun ega.« L'intervënt á doré feter n'ora y mesa, spo él ciamó rové adalerch injiniers da Balsan che á fat n surapost. I auti, che ê tla secunda alzada, á messü gní condüc alaleria cun na pachera, por evité che ai podess ciamó n iade pié füch sura nöt.   (kp)