La Usc di Ladins

Canche la doman y la sëra mët man da gní plü frësches, le sorëdl pëia do Gardenacia jö y la natöra se arjigna bel plan ca da palsé por plü tëmp, sán che por i paurs él gnü le momënt da gní de munt cun i tiers de Fanes. Sciöche vigni ann tomel ite chësc evënt en la terza domënia de setëmber en gaujun dla segra de Badia. En chësc ann él sté n’aisciöda bunorida y an á podü jí denant a munt, l’isté deperpo é sté bindebó süt. Tröc se á fat demorvëia dla pücia ega dl Lech de Lim y tert él sté les plöies che á colorí indô la munt de vërt. Dër frëit ne él nia sté, mo n de dan da gní de munt al fat jö la nëi, al ê ora da gní zoruch. Ince les vaces y i ciavai le sintî, nia ri ne él sté dales paré la sabeda jö en Laguscí, por ti sciampé ala nëi. Intratan te paisc él sté les uniuns da paur che se á á arjigné ca bele n valgügn dis denant por che la festa garatass. La sabeda domisdé ia, en vëia dla segra, él gnü alzé le lëgn cun l’aiüt de deplü volontars, do cört tëmp le odôn ince da dalunc. Te ciasadafüch él sté n gran da fá por arjigné i crafuns. Les gran bronsines y ciampaneles cun i cioi cujis fora é indô gnüs tuc ca, y al é gnü da slisoré tl dindl o tla braia de coran. La cianties metüdes sö dal Dj á intratigní la jënt cina tert.

Deplü tla ediziun stampada da en vëndres ai 23 de setëmber.   (Lucia Piccolruaz)