La Usc di Ladins

Dal Vangele do San Lüca 16,19–31

Te chël tëmp á Gejú dit: »Al ê n iade n ël rich, che se vistî de purpur y lin fin y viô da de a de, s’la godon y s’la don bona. Mo dan la porta dl ricun êl ponü n püre ël, che â inom Lázarus, dal corp plëgn de plaies. Al s’ess ion paré la fan cun ci che tomâ jö de mësa dl ricun. Cinamai i cians gnô a ti liché sües plaies. 
Do che le püre ê mort, él gnü porté dai agnui tl gremo de Ábraham. Ince le rich é mort y é gnü sopolí. Tl somonn olach’al gnô tormenté da n gran dolur, ál ciaré sö y odô dalunc Ábraham, y Lázarus te so gremo. Dailó ál scraié: Pere Ábraham, mënete picé de me, y ortiëia Lázarus jö da me; al dess almanco tocé la piza de so dëit t’ega y me renfresché la lënga, deache chësc füch me tichinëia. Ábraham ti á respognü: Mi möt, pënsa do, che t’as bele tratan tüa vita ciafé tüa pert de bëgn, Lázarus indere ma de stlet. Sëgn vëgnel consolé por chël, tö indere mësses patí. Implü él danter nos y os n fossé dër sot che ne se lascia nia passé ia, tan che degügn ne sciafia da rové da chiló ia da os, no da dailó ca da nos, gnanca sc’an oress. Spo á dit le ricun: Porchël te prëii, pere, ortiëiele tla ciasa de mi pere! Deach’i á ciamó cin’ fredesc. Al dess i amoní, ch’ai ne röies nia ince ëi te chësc post de tortöra. Mo Ábraham ti á dit: Ai á Mosé y i profec, ai dess ascuté chi. Al á respognü: Nou, pere Ábraham, ma sce un di morc röia ia da d’ëi, se convertiarái. Sön chëra á Ábraham dit: Sc’ai n’ascuta nia Mosé y i profec, ne se lasciarái gnanca mazé ite de crëie, sce un ressorësc dai morc. 

Parora dl Signur. – Lalt a te, Gejú Crist.