At de vandalism a Corvara, tla serada di 22 de merz. Na porsona o porsones nia conesciüdes á scrizoré sö cun na gran scrita a fosch la falzada dl mür dla cortina, che é defata sura la picia dlijia de Santa Tarina. Le messaje che é gnü smardacé sö é adressé ales forzes dl ordin, ci che an vëiga ince dala sigla "ACAB", olache les iniziales stá por n insult a dötes les forzes de polizia. Al desplej dagnora sce al vëgn danejé bëgn publich por lascé fora le sënn y la frustraziun. Tan deplü sce ara nen vá de n post sciöche la cortina de n paisc, che messass descedé ciamó deplü la sensibilité y le respet devers les porsones che n’é nia plü. I Carabiniers da Corvara é sambëgn informá dl fat sozedü. I un porchël contaté
le marescial dla staziun da Corvara Armando Di Genova, cun la domanda sce le messaje ê ot cuntra i Carabiniers? "Chël é rî dí. Al é ôt cuntra dötes les forzes dl ordin, spo pól ester miné Carabiniers, Polizia, Finanza o Polizia Locala. Al foss da ti al damané ala porsona che á scrizoré sö." En cunt de ci che al sozedará sëgn, dij Di Genova che an aspetará n iade al Comun, patrun dl mür, sce al fej na plüra. "Zënza jarunse nos inant d’ofize", injuntel, spezifican che al sará rî da ciafé fora la porsona o les porsones: "sce an ne l’abina nia söl fat, él dër rî". Zënza orëi smendrí le fat che é sozedü, spliga Di Genova: "Al n’é nia n at teroristich, al sozed cotan de peso incërch. Iö ne me feji plü morvëia de nia". Podess pa le messaje da Corvara ince ester na espresciun sterscia por i controi che vëgn fac sön strada? Di Genova: "Chël ne savunse nia, mo por nos ne se müdel nia. I fajarun inant i controi. Che al sides alcol al volan, o abus de sostanzes o d’ater: al ne pó nia gní sö danter la jënt na idea che an ne vëgn nia straufá, che vignun pó fá ci che al ó. Al pó ester che valgügn n’é nia a öna cun les regoles, mo chëres ne fajunse nia nos. Nos les aplicun."
(pablo)