La Usc di Ladins

I »Pirats Freestyle Team« é n grup de jogn che tira salc y fej corëtes cun i schi y cun le snowboard. Iniann d’invern ai fat para pro deplü spetacui, che á dër plajü y che á cherdé adalerch n gran publich a ciaré pro. Dantadöt mituns y jogn é dër afasciná dai »Pirates«, ai proa dai fá do y oress, magari, n bel de ince ëi fá pert de chësc grup. Insciö se abina tröc tl »Snowpark Alta Badia«, a San Ciascian, por porvé y imparé da fá salc y corëtes. Mo dlungia l’alenamënt y le talënt ol ince ester i consëis y l’aiüt de chi che sá bele da fá chësc sport. Por via dl covid á i cursc dla »Pirates Freestyle School« messü gní desdic, mo la domanda é grana y porchël gnarai indô bunamënter organisá le proscimo ann. I nen n’un baié cun Altin Alla, un di fondadus di »Pirates«, grup che é gnü metü sö dl 2008, dan da chinesc agn.

La Usc Altin, can y co é pa nasciü le grup di »Pirates«?
Altin Alla Iö á dagnora albü na gran pasciun da jí cun le snowboard y da trá salc. I jô cun mi compagns, mo chi agn ne êl nia ciamó n grup. Lucas Valentini, »Lux«, che é n mi bun compagn, â metü sö i agn denant n grup, che â ince bele inom »Pirates Freestyle Team«, mo ai â spo lascé y canche al gnô fat spetacui chiló tl’Alta Badia gnôl dagnora cherdé grups da foradecá, en particolar i »Vitamin F«, olache i atlec fajô salc mo indere ma cun i schi. Dl 2008 unse ponsé, iö y Lux, che i esson indô podü porvé da mëte sö le grup, cun y por jogn dl post che á chësta
pasciun. Y insciö él naciü le »Pirates Freestyle Team«.

Olá aste pa tö imparé da jí cun le snowboard?
Iö á scomencé cun 17 agn da jí cun le snowboard y i á dagnora albü na gran pasciun. I á spo ince metü man da trá salc, tröp ai imparé da su, mo consëis importanc ai ciafé da Werner Crazzolara y Maurizio di Berardino, maestri de snowboard da San Ciascian y ince da Lux, che ê chi agn sponsorisé y fajô gares cun le snowboard.

I podëis lí döta l'intervista t'La Usc stampada che vëgn fora en vëndres ai 7 de aurí. 





 (kp)