La Usc di Ladins

Canche al vëgn l’aisciöda ne él nia ma plantes y tiers che se descëda a vita nöia, mo al é ince tla natöra dla porsona che an ciafa vëia da fá, da pié ia, da rodé, da odëi val’ de nü. Porchël á n grup de pici y gragn da La Val tut sö l’invit dl comun y á fat le cufer por jí na fin dl’edema a Pfronten, tla Germania, a ciafé so comun de jomelinaje

L’iniziadú dl proiet y vizeombolt Felix Dapoz nes acompagna sön le iade che condüj sura le Fernpass tl’Austria foraijö tla bela planöra vërda tl raiun de Füssen. Chiló se destënn fora de plü de bi lec y i bosć incëria porta ciamó süa bela iesta sana vërda.
Pfronten é n comun de passa 8.000 abitanc tl Ostallgäu, defata do le confin cun l’Austria. Al ti vëgn ince dit "13-Dörfer-Gemeinde", él pö metü adöm da 13 de pici paisc. Ince sce le comun é a na altëza de bëgn 500 m plü bassa co La Val, plü avisa a 850 m.s.l.m., ciafon impó chiló plü o manco la medema vegetaziun y la natöra ne é nia tan plü inant co te nüsc paisc. Ara se lascia dlaurela da mené fora, deache ara é sotmetüda ales aries frësches che vëgn dal nord. Chiló tomel na mesaria de prezipitaziuns dër alta y la nëi taca fina jö te paisc.

Liede inant deplü tla ediziun atuala de La Usc di Ladins!