La Usc di Ladins

En chësc ann dai 26 ai 28 d’otober ésera indô stada tan inant, y chësta ediziun dl marcé dlafora é jüda bun de morvëia. Al é gnü adalerch milesc y milesc de porsones y dër tröpes é porchël ince stortes pro dan le stont dles patrones por se lascé vizié dales saus dla spëisa ladina. Aladô é spo tomades fora ince les spënores che é gnüdes ite y che an á podü passé inant: l’asssëgn de 3.000,00 € ti é gnü surandé al “Wünschewagen – To ultim dejider” da Balsan, y l’ater assëgn de 3.000,00 € ti é gnü surandé al assoziaziun “MOMO–Förderverein Kinder–Palliativ in Südtirol” de Ciastel/Kastelruth. Les spënores é gnüdes surandades ofizialmënter en sabeda ai 18 de november 2023, pro la sentada generala dles patrones dl comun da San Martin, stada tl salf di stodafüch a San Martin de Tor.
De fat comporta chësta aziun por les patrones dl comun da San Martin sambëgn cotan de laur, pinsiers y bries, mo ara scinca ince na gran sodesfaziun. L’aziun jará porchël inant ince i agn che vëgn.