La Usc di Ladins

La "iata borba" è en jüch feter mort fora, mo i dijun "feter", deache al è ćiamó de chëres y chi co le tin vi. Almanco a La Pli de Mareo. En Santabogna vëgnel cherdé adöm en grup de porsones te na stöa o te en maiù salf, por chirì fora le pröm, a chël che al i vën stopé o ciolé pro i edli - por che al ne vëghi nia. Canche ara è tan ennant che cösc ne vëga plü nia, vëgnel rodé por che al perdi l’orientamont, y dedô lascé su en pè amesa stöa por che al mëti man da pié ia a chirì y pié zacai. I atri è encërìa, roda y sciampa, por che ai ne vëgni nia abinês. Canche öna o önn è pié, mëss le protagonist stomé chê che al è, por cösc anüzel les mans y inće le nês... Sambën pol inće baié da rì y proé da mëter da rì chi encërìa, por che ai se embanësci. En iade che chël pié è identifiché, i tóchera a cösc da se lascé ciolé pro i edli y pié ia a nen abiné öna o önn.
Por fà cösc jüch ne adoron nia, al basta en fazorel o ćiaz por ciolé ia i edli y na bona compagnia co sta ienn adöm, ô en pü’ s’armere y büsié, y se cherié söa aurela cörta te ćiasa. Ester èl inće na ocajiun por sozialisé... Y an s’anadà spo che al n’ô nia ester en "social-network" por trà ia le tomp, y chirì y apié compagns!  (Iaco Rigo)