La Usc di Ladins

I cosć dl frabiché é y resta na tematica dër atuala te Südtirol y cis ince te nüsc paisc ladins. Cun l’atrativité, le boom turistich y nia inultima la speculaziun, é i prisc di terac rová ales stëres. Le frabiché alisiré é deventé döt ater co lisier y de nosta jënt cun n laur "normal" á apëna plü le mö’ da rové pro süa abitaziun de proprieté. Öna dles conseguënzes: jënt ladina mëss zessé da nosta valada por jí a d’abité e posć olache i prisc é "ciamó da sciafié": i comuns da Laiun defora da Gherdëna o San Laurënz defora dala Val Badia nen sá valch.
Cun le fin da pité na poscibilité da abité a prisc che an pó se pormëte, él gnü metü en pe la formula dles abitaziuns a prisc lié, por todësch "Wohnungen mit Preisbindung". Por splighé damí de ci che ara nen vá y co che chësta poscibilité funzionëia, á la Consulta Provinziala dla Jonëza metü a jí l’edema passada na sëra de informaziun a La Val. Che l’interes é gran, án odü dala partezipaziun, olache al é rové alerch incër 100 porsones, prinzipalmënter jënt plü jona, mo danter le publich ince valgügn architëc y rapresentanc di comuns vijins. Dlungia la presentaziun dl sistem dles "abitaziuns a prisc lié", él ince gnü presenté na proposta concreta por n raiun a La Val. 

Deplü sön chësta serada, sön le raiun a La Val y sön les poscibilités da mostré interes, ciafëise t’La Usc di Ladins di 20 de jügn  (pablo)