La Usc di Ladins

Ai 14 de jügn é jüs en funziun ince i implanc portamunt tl’Alta Badia, che s’á insciö injunté a d’atres localités, sciöche chëra de Gherdëna y de Plan de Corones, che â bele daurí tl mëis de ma. Canche düc i raiuns ará daurí la sajun da d’isté, sarál en funziun bëgn 140 implanc portamunt sön le teritore dles Dolomites. L’oferta dl »Dolomiti Supesummer« porta iniann indô deplü propostes por le ghest y i aciasá, che á l’ocajiun da descurí la munt te manires desvalies y tres plü tecnologiches.

Cun proiec jogn, nasciüs dan da val’ ann y che é tresfora ciamó söl tru dl svilup, ciara le comprensor dles Dolomites da amplié inant l’oferta por la sajun turistica da d’isté – na sajun che é tl crësce y che davagna tres plü importanza. 
Sön na rëi de percursc nüs vëgnel lauré inant, por ciafé soluziuns, dailó olache la domanda incunta l’oferta atrativa, y les desfides dl turism da d’isté incunta idees inovatives.
Dles novités da iniann y dles desfides dla sajun turistica da d’isté, unse baié cun Andy Varallo, presidënt dl Dolomiti Superski y dl Consorz Skicarosello.


La Usc Fá deventé la sajun da d’isté plü atrativa tres n’oferta plü rica. Ciünes é pa les desfides liades a chësc travert?

Andy Varallo Le travert é chël de pité al ghest da descurí la munt te manires alterna­tives y en pert ince liades al deverti­mënt. Por chësc ól ince ester la dërta rëi de percursc, che i ne un nia ciamó arjunt y che ne é por le momënt nia saurida da lauré fora inant. Al n’é nia plü tan saurí da fá intervënc tla munt por amplié la rëi de trus por rodes o l’oferta de parcs tematics por families. La prozedöra é com­plicada. Por podëi indere pité n’oferta atrativa mësson podëi investí sön le produt, porchël sunse tl sciacaré cun la politica y i sperun tosc da podëi rové pro na soluziun. 


Deplü da lí ciafëise tla ediziun nöia de vëndres, ai 20 de jügn!