La Usc di Ladins

Canche le salf dles Uniuns a La Pli é plëgn cina al ultim post, le chît dl publich se fej sintí y an alda la pröma acordanza delicata di stromënc, spo él indô le momënt: la Musiga d’La Pli ves inviëia a so conzert tradizional de Pasca de Ma – n evënt musical che i fej ligrëza ai spetadus dl post y da foradecá. La Musiga é gnüda menada dal dirighënt Fabian Taschler, che á condüt le program comples cun gran sensibilité musicala.
En chësc ann él n presidënt nü: Fidelis Ploner, che á surantut chësta inciaria cun impëgn, idees nöies y tröpa pasciun. Bëgn 62 musicontri y musicontres atifs fej pert dla musiga, öna dles musighes plü jones dl teritore, cun l’eté mesana che é sot i 30 agn, ci che se respidlëia ince te so dinamism, te süa energia y te süa daurida ales desfides musicales. Da forá incá él gnü tigní proes intensives dui iadi al’edema, te registri y proes düc adöm, cun gran impëgn, tigní adöm y amur por la musiga. Al á paié la mëia: le conzert da en chësc ann s’á trasformé te n iade musical imprescionant fora por le monn, cun la musiga che á porté dant n program sofistiché por n iade incër le globus.

Deplü nes cunta Tanja Ploner, t’La Usc di Ladins di 27 de jügn