La Usc di Ladins

En chësc isté él rodé na figöra nöia sön i jus dl’Alta Badia, chëra dl »Dolomites Ranger«. Nasciüda é chësta figöra tres na scomenciadia, sciöche proposta da pert dla Co­operativa Turistica Alta Badia por renforzé la mediaziun de informaziuns importantes sön la sconanza dl teritore, les normatives y de co se möie cun responsabilité tla munt. A chësta mainira él gnü metü pormez chësta presënza nöia, bele presënta te d’atres valades incër les Dolomites, mo che manciâ ciamó sön le Ju de Frara, le Arparora y le Ciaulunch. 

Por nen savëi deplü de chësta figöra, sü compic y sües competënzes, n’unse baié cun Christoph Pezzedi, che á en chësc ann surantut l’inciaria da »Dolomites Ranger« tl’Alta Badia. Tres n’intervista nes ál cunté deplü de süa esperiënza y dles desfides che al á incunté rodan sciöche ranger.


Le »Dolomites Ranger« é na figöra nöia: ciügn é pa sü compic? Ciodí adorunse pa chësta figöra nöia? 

(Christoph Pezzedi) Le compit maiú che le ranger á, é chël da i dé informaziuns ai escur­jionisć y ai vijitadus che vëgn te chësc raiun. Le savëi che vëgn partí reverda la munt, indicaziuns porsura i trus, sciöche ince consëis söla atrezadöra. Al i vëgn recordé les normatives da tigní ite a chi che roda cun le camper y ó se archité tratan la nöt y a chi che roda cun la tënda. Al vëgn daidé recordé le dër comportamënt sön les strades di jus, che é por le momënt dër traficades. An röia insciö te na discusciun cun i vijitadus, che vëgn sensibilisá y ince daidá inant.


Liede inant tla ediziun nöia de vëndres ai 29 d'agost!