La Usc di Ladins

En chësc ann unse abiné na sëra dl Cör de Gejú spetacolara, cun cil sarëgn y bun cialt. Al ê indere ince da mëte averda por le terac secé fora, por gauja di cialduns di ultims dis. Tla Val Badia ésera dolarata jüda dër bun. Ma a San Ciascian á i Stödafüch albü da jí plü iadi, olache so intervënt asvelt é ince sté dezisif. La pröma cherdada é gnüda defata do mesa dales 10 da sëra, olache n ghest â fat alarm che al se temô che n füch abinass le bosch. I stödafüch é jüs a ciaré, mo ara se tratâ de n füch dl Sacher Cör, jënt ê lapró, prigo n’êl degun. Piec éssera podü jí defata dedô, tla localité Dlira nia dalunc dal ciamp dal sport. Le comandant di Stüdafüch da San Ciascian Devis Crazzolara cunta: "I sun gnüs contatá da na porsona che al ti sciampâ le füch impié por la festa. Le problem é che al s’â ót le vënt y les tizes jô sö por na vedla ciasa dejabitada."
Chëstes tizes á gaujé n prinzip de medefüch. Por fortüna é i stödafüch stá defata söl post, insciö ésera ince atira jüda da destodé les flames. Ciamó incër la öna de nöt é i stödafüch jüs söl medemo post por destodé do y fistidié che i borëis ne foss nia ciamó n iade prigorusc.  (pablo)