La Usc di Ladins

Al é sté bindebó de spordüda y scassarot, en domënia domisdé, canche al á metü man da se slarié fora la noela che al ê mort le marescial di Carabiniers d’Al Plan Nicola Marino. "Po co?", s’ará ponsé tröc de chi che le conesciô. Al â pö pormó 59 agn. Baldi ê la noela vëi. L’alarm é gnü dé chël 27 de messé püch dan les 11 danmisdé. Le marescial Marino ê jü deboriada cun süa compagna a La Ila, por fá la via ferata "Les Cordes", che condüj cina sön Gardenacia. Sozedüda ésera defata do che ai é piá ia, tla pröma pert plü ërta. Le marescial Marino s’á sintí mal y é tomé dofora, restan insciö taché tla corda, zënza dé batimënt. A nia n’á jové i socursc che é gnüs cherdá ala snela, cun l’intervënt dl Aiüt Alpinisć Alta Badia, cun le joler dl Aiüt Alpin y le dotur d’emergënza. Al maresciâl ti âl dé le bot y al n’ê oramai plü nia da nen fá. Insciö n’án baldi podü fá nia ater che constaté la mort, olache le corp é gnü joré y spo deponü tla capela dai morc a Corvara.
Tröpes é stades les reaziuns de aprijamënt y comoziun por Nicola sön i canai soziai. Danter les tröpes parores de aprisc ince chëres dl ombolt Albert Palfrader che scrí: "Cer Nicola, iolan de cör por ci che t’as fat por düc nos; te nes manciaras y i Te recordarán cun gran afet".

En mercui danmisdé la sopoltöra
Rodunt en doman mertesc gnará le corp deponü te capela dai morc a Al Plan, olache al sará spo dales 19:30 na corona por le defunt. La sopoltöra é spo en mercui danmisdé dales 10:30, te dlijia d’Al Plan, olache la jënt ará l’ocajiun da l’acompagné sön so ultim iade. Ai familiars les condolianzes plü sontides. Che Nicola Marino palses tla pêsc de Chël Bel Dî.

Le marescial Marino, che ê dër integré tla vita de paisc, respeté y bunorü tla comunité de Mareo, recordarunse ince cun val’ pinsier y retrac t’La Usc di Ladins dl 1. d’agost.  (pablo)