La Usc di Ladins

L’isté é la sajun che jënt vá sö por munt. Olache al pëia ia les beles escurjiuns s’abinel ince adöm n gröm de jënt y insciö gonot n gröm de auti. Te nüsc paisc dla Val Badia nen savunse valch.  Chësc á porté i comuns da regolé les plazes impröma y gonot da les fá a paiamënt dedô. Oramai él dainré n post olache an podess pié ia zënza se tó do le tacuin. O che al é da paié n daz, o che al é da paié n bus, o che al é da paié na plaza.
Dai 28 de messé incá ésera insciö ince a La Val, olache le Comun á tut la dezijiun da fá paié i posć da parché sön 8 plazes. Al e porí plazes da na pert fora, olache jënt lascia l’auto por pié ia a fá les escurjiuns sö por munt. Ci che desfarenziëia La Val da d’atri comuns, é che an á porté ite n sistem zënzater ciamó nü te nosta valada: chël da s’aposté y ince da se paié la plaza danfora. N provedimënt che dess sorví por regolé damí les plazes instësses, por evité che i auti vëgnes lasciá jö olachessî o vais sö a chirí plazes che n’é nia, cherian trafich dessurora. Mo ince por curí val’ cost de afit di grunc y por manutenziuns.
Co che le sistem dess funzioné, é gnü splighé te na serada de infor­maziun ai 23 de messé, te chëra che al é gnü baié en general dla situaziun cun les plazes da parché te paisc da La Val, a Pidrô y chëres da na pert fora. Les plazes che é sëgn a paiamënt é – sciöche dit – chëres che an adora canche an pëia sö por munt. Tl con­cret nen vára de 194 posć da par­ché, partis sön sön les plazes de Fornacia, Spëscia, Ramëi, Ciavaza, Ciornadú, Fontanela, Tolpëi y Runch/Biëi. Da paié él vigni de y döt l’ann, dales 8 da doman cina ales 17:00, cun na tarifa sora de 7,00€ al de. I residënc dl comun da La Val pó fá domanda da ciafé n bon, cun chël che ai paia ma 3,00€.

Deplü sön chësta novité y co che döt funzionëia, podëise lí t’La Usc di Ladins dl. 1. d’agost, olache i ciafëis ince na intervista cun le vizeombolt Felix Dapoz.  (pablo)