La Usc di Ladins

Aladô dla tradiziun á te vigni dlijia dla Val Badia dötes cater les gran uniuns dla comunité cristiana n so confarun, chël ó dí che al nen é un por la uniun di ëi, un por la uniun dles ëres, un por i jogn y un por les jones. Insciö éra ince te Badia. Porvia che chël dles jones ê plülere en malester án en chësc ann tut la dezijiun da le lascé fá danü. Benedí él gnü en gaujiun dla festa de patrozine, plü avisa tratan la mëssa grana en San Iaco. Amez él la pilora cun lassura Santa Maria cun le mantel che dá proteziun y sön la man ciampa dui benefaturs, deperpo che sön la man dërta él n valgönes jones cun la troht. Sciöche corú él gnü chirí fora n motif floreal vërt sön na basa ghela. Ot batotli decorëia la pert alta y dodesc batotli le stlüj jö jödapé. Siur degan, Iaco Willeit, á tut ocajiun por rengrazié ince düc i 14 portaconfaruns y i benefaturs che dá tres indô na spënora da mantigní y fá danü, canche al vá debojëgn, i confaruns. (dv)