La Usc di Ladins

Na sentada bindebó spëssa por le Consëi Comunal de Badia, en mercui ai 16 de messé, canche al é sté da traté bëgn 29 punc al ordin dl de. Plü co mec revardâ la nominaziun de comisciuns comunales y rapresentanzes te grëmi desvalis. Un di plü zîti ê indere le numera 6, olache le Consëi messâ tó na dezijiun de mascima por dé jö la infrastrotöra dla fira otica – n vare che ince Corvara á fat, tla sentada di 3 de messé.
Al é normatives europeiches y ince talianes che ti proibësc ales istituziuns publiches da ester tl medem tëmp proprietares y ince gesturies dla rëi dla fira otica. Chësc é indere le caje ti comuns de Badia y Corvara, che â bele dan da cotan d’agn metü man de süa iniziativa da arjigné la rëi ti paisc: le sorvisc gnô damané a gran usc, mo les soluziuns se intardiâ. I dui comuns dl’Alta á insciö fat inant da susc. Badia á ala fin investí chi 2,8 miliuns de euro por ti porté a sü zitadins la fira otica cina dan ciasa – ci che d’atri comuns de Südtirol na ciamó incö nia. L’ombolt Christian Pedevilla á porchël recordé cun rajun che "Le sorvisc che le Comun de Badia á fat por i zitadins é enorm". Sëgn mëss le Comun indere dé demez l’infrastrotöra, madër che al ne ciafará nia lassura ci che al á investí.

Deplü sön la chestiun, sön le program dl Ombolt y ince sön la discusciun por la tematica di jus, ciafëise t’La Usc di Ladins dl 1. d’agost  (pablo)