La Usc di Ladins

Le rî tëmp n’á iniann nia tigní sö le tradizional »Bal dles Stries«, che s’á desfiré la sabeda ai 26 de messé da sëra, cun temperatöres valgamia frësches por le mëis de messé. Porimpó á l’evënt cherdé adalerch ince te chëstes condiziuns atmo­sferiches zacotan de spetadus, coriusc de odëi dal ví les stries de Börz. L’evënt é oramai deventé tradiziun; al vá derevers ai pröms agn dl 2000, canche al ê pié ia cun les prömes rapresentaziuns teatrales y musicales ti pra de Pütia. Cun le tëmp s’á la manifestaziun amplié ala per dl grup d’organisadus doía y é rovada a ester chël che ara é sëgn: na mani­festaziun che tol ite, dlungia la pert musicala y teatrala, ince workshops creatifs y intratignimënt por les families. Insciö é la manifestaziun piada ia ince chësc ann bele ia por le domisdé, cun ativités por i plü jogn y n pice marcé d’artejanat sot le crëp de Pütia. Na pert dl program dedicada ala cultura y n curs de dessëgn é stades les novités de chësta ediziun, che á indô injunté val’ de nü tl program, fajon da cornisc ala tradizionala performance dl »bal dles stries«, acompagnada dal grup de tambüri de Max Castlunger.

Deplü podëise lí y odëi t’La Usc di Ladins di 8 d’agost  (mo)