La Usc di Ladins

En vëndres ai pröms y en domënia ai 3 d’agost él sté tles dlijies de Badia y Al Plan de Mareo dui de bi conzerc dl cor Kerygma y dl’Orchestra Val Badia cun compagns. Söl program êl le Magnificat de Kim André Arnesen y n valgügn d’atri toc, sot la bachëta dl maester de musiga y dirighënt Bruno Rives. Bruno á bele da d’aisciöda fora orü mëte man cun les proes, savon che i toc s’adorâ döt l’impëgn da pert dl cor y dl’orchestra. Al é gnü invié ciantarines compagnes a daidé cianté para, ince l’orchestra é gnüda renforzada da n valgügn amisc musizisć.

Le conzert á metü man cun le toch a capella "Ave Maria" de Franz Biebl, olache n terzet de ëres á cianté cun bravöra le "Angelus Domini" danfora y tres indô tratan la ciantia, che se baratâ jö danter perts por cor y por soli. Do le salüt y les parores de introduziun, él gnü pormez l’orchestra y al é gnü porté dant le Magnificat. Ara se trata de n’opera de musiga sacra contemporana dl componist Kim André Arnesen (*1980), por sopran, cor y orchestra, partí ite te set perts. Les melodies liriches y lisieres y armonies sintides se barata jö cun momënc de gran dramatizité, alzan fora insciö le valur spiritual dl test biblich, cianté por latin.

La solista Barbara Gasser á cianté cun talënt y gran competënza la pert dl sopran solo y implü é l’opera gnüda abelida da d’atres solistes fora dl’orchestra y dl cor. L’esperiënza musicala é gnüda arichida dales videoproieziuns cun les traduziuns di tesć por talian y todësch y pitöres che passenâ ite bun y ti dê a döt ciamó plü profondité.

Deplü sön i conzerc nes cunta Angelika Schuen, t’La Usc di Ladins di 14 d’agost