La Usc di Ladins

Cun 38 intervënc desfirá dl 2025, pó i Stödafüch da San Martin ciaré zoruch a n ann n pü’ plü lisier. Al ó sce dí sce al stá fora i gragn danns dal rî tëmp, che á cherdé al apel tan gonot ti agn passá – cis ince tl comun da San Martin. Porchël án pa bëgn impó albü da fá, sciöche al é gnü trat bilanz pro la sentada generala, stada la sabeda ai 28 de forá. Dlungia stödafüch atifs, stödafüch jogn, mëmbri d’onur, mëmbri fora de sorvisc y totes, á le comandant Damiano Moling ince podü saludé le vizeombolt Felix Graffonara, le presidënt di stödafüch dl raiun Bassa Val de Puster Alois Steger y l’ispetur dl raiun Bassa Val Badia Alex Zingerle, rapresentanzes di stödafüch vijins, dla Crusc Blancia y dles forzes dl ordin.

Sciöche dit, á la sirena o le pîps ringhiní 38 iadi, de chisc 33 por intervënc tecnics y 5 iadi por medefüch. Tröp á i stödafüch messü jí sön la strada dla Val Badia, nia ma por inzidënc sön strada, mo tres indô ince por tó demez lëgns y peres. Plü pesoch é sté n inzidënt cun ferí do n tru de bosch a La Val y n inzidënt sön la munt de Fanes, olache chi da San Martin é jüs a daidé. A chisc intervënc s’injunta chi da tó demez ospá, sciöche ince i intervënc de sostëgn ala Crusc Blancia canche le socurs n’ê nia bel atira danman. Te chësc contest él ince garaté l’intervënt plü de suzes dl ann, olache i stödafüch é gnüs cherdá por na reanimaziun, che ti é belavisa garatada denanche la Crusc Blancia rovass sön le post. 

Deplü podëise lí t’La Usc di Ladins di 13 de merz  (pablo)