La Usc di Ladins

L’ultima fin dl’edema é stada sot al sëgn dl’inclujiun sön pista. Trëi dis alalungia él jü inant le program dla manifestaziun che á pité l’ocajiun a assoziaziuns desavlies sciöche ince les scores de schi locales, da renforzé la rëi de colaboraziun por la promo­ziun dla diversité tles disciplines sportives da d’invern. I jüc para­limpics s’á stlüt jö da püch y al é n momënt atoché por porté dancá la tematica de sciöche chëstes disci­plines pó ester inclusives, sce an á le coraje da jí trus nüs.

Iniann s’á deplü organisaziuns, sides da defora co dl post, metü adöm por mëte a jí n de dla porta daverta olache porsones cun debojëgns particolars á podü porvé fora ativités devalies sön nëi. Le program á doré por döta la fin dl’edema danter i 27 y i 30 de merz cun deplü mëmbri y surastanc de assoziaziuns sportives che á fat para. Al é gnü pité acompagnamënt da pert de spezialisć y leziuns dai maestri de schi cun formaziun speziala. 
L’assoziaziun di »Freerider Sport Events« á danü fat tapa tla localité cun n gran grup de amaturs dl jí cun le »mono­schi«, tratan che la »Fondaziun Allianz UmanaMente« á chirí la colaboraziun cun le Consorz Skicarosello Corvara, Movimënt Alta Badia, Club Moritzino y les scores de schi dl raiun por pité ales families deplü dis de devertimënt y intrategnimënt.

Le de dla porta daverta é gnü metü a jí tl cheder dl proiet »Winter Sports Inclusion«. Por le pröm iade á la »Fondaziun Allianz Umana­ Mente«, che se crüzia de scomen­ciadies soziales, daidé sostegní l’evënt ince por promöie le sport paralimpich. N momënt particolar é sté chël dl’esposiziun dl chentl paralimpich de Milan­-Cortina cun la presënza dl’atleta paralimpica fasciana Chiara Mazzel, che á partezipé ala pert ofiziala dl evënt.

Liede inant tla ediziun nöia de vëndres le 3 d’aurí!