La Usc di Ladins

La Marcialonga Cycling Craft 2026 l é stat n suzes con 1.600 partezipanc da presciapech 20 nazions. En domenia ai 31 de mé, te na giornèda ciauda e da soreie, da les 8 da doman i atlec con la roda é ponté via da Pardac, chi per fèr i 80 chilometres de la garejèda più curta e chi per pontèr al travert de chela de 135 chilometres.

I pronostics de la granfondo no era nia deldut chières con desvalives atlec vertesc a dir la sia per n podie emportant: do la partenza, ti prumes chilometres se à formà n grop con dantfora Matteo Fontana che é ruà per prum sul Jouf de Ciareja e prum sul GPM Craft sun Pampeago. La erta dezisiva l é dapò stat chela del Valles olache Giuseppe Orlando à fat l busc e l é ruà prum al travert de Pardac te anter na fola de jent, secondo Celano e 3° l badiot Franz Wieser che cor per Rodes Val Badia Raiffeisen.

N grum de sostegnidores enlongia strèda ence per la garejèdes più curta, chiò uzon fora la 12^ posizion de Jacopo Fanton, la 15^ de Massimino Chiocchetti, la 22^ de Patrick Seber e la 32^ de Manfred Mölgg.

Podede lejer dut su La Usc stampèda dai 5 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (MCI)