La Usc di Ladins

L é stat festa grana en domenia ai 31 de mé a Pera, con na lingia de scomenzadives pissèdes e endrezèdes dal Comitat parochial con a cef Cesare Bernard per enjignèr la comunanza a viver tant dal pont de veduda religious che da chel sozièl e storich la memoria di 50 egn da la consacrazion de la gejia neva ai 27 de jugn del 1976 e la inaugurazion de la gran crousc sun Sas de Pere da fech stata na setemèna dant. Momenc emportanc per la jent da Pera, che a despet del inom 'musciac', o fosc apontin desche chesta sort de besties, la stèsc ben en compagnia é la bona de tegnir adum.
»Na comunanza zenza recorc no l é na comunanza« l à dit don Mario en vender ai 29 da sera, canche te gejia de Pera l é stat la prejentazion del liber »Una chiesa accoglie una croce custodisce«. L é stat un di desvalives momenc endrezé per tor ite la jent e ge dèr peis e segnificat a chest dopie cedean, apede a chi religiousc e a la prejentazion de veies filmac e testimonianzes storiches te teater del oratorie de Poza.
L nef liber l é rich de informazions e retrac e l ge va do desche impostazion a chel su don Edy Cinzol vegnù fora del 2018 per i 30 egn da la mort de chest preve, che l à volù ence la realisazion de la gejia neva.

Ensema e co la colaborazion de tropes se pel fèr n muie e en domenia se l à vedù chiaramenter. Al scomenz de la bela zelebrazion
con don Mario Bravin e don Bruno Daprà, che l à ret la parochia de Pera dal 1980 al 1997, l é stat portà te gejia la linterna che da 24 ores, a roda vigni ora, desvalives gropes aea portà stroz per ogne piz del paisc, fin sa Ronch e Muncion, per vardèr via e fèr ruèr daperdut la lum. Con chesta l é stat empeà su la ciandeiles sul utèr de la gejia e endèna i ciantores gregn e joegn da Pera adum, che vidé da Martin Bernard i à compagnà con gran braura duta la zelebrazion con cianties per ladin, latin e talian, i entonèa »Voi siede l sal de la tera«.

Podede lejer dut su La Usc stampèda dai 5 de jugn da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)