La Usc di Ladins

Che i stödafüch dëida oramai a 360 gra, savunse. Y ince che danter sü punc d’intervënt él bindicé val’ tiers. Sce valgügn podess avëi imënt le famojo iat che ne vëgn nia jö dal lëgn, spo él sëgn ince le cian che ne vëgn nia fora dal ro. Chësc é sozedü en vëndres ai 2 d’otober dala öna domisdé a Corvara. Na sciora todëscia jô a spazier cun so cian, canche le tier ti é sciampé cun corda y döt. Nia dalunc dala burcia olache la varianta dla pista de Crëp de Munt röia ite tla pista de Boé, él n ro dal’ega che despassa ca la pista. Ne s’á pa le cian rodunt intopé da jí ite por chël ro. Madër che canche le tier orô gní fora zoruch, él sté la corda che s’á asmacé ite y al n’ê nia plü bun da gní fora. Söl post él rové i Stüdafüch da Corvara, che s’á atira tut para na camera da ciaré ti ros, cun chëra che ai á messü jí ite bëgn 18 metri cina che ai é rová pro le tier. Por comedé êl döes poscibilités: o che al gnô daurí sö le ro, o che zacai jô ite. I stödafüch á chirí fora la secunda varianta, olache n om s’á trat ite por le ró, instës taché te na corda. Canche al é rové pro le tier, ál taié ia la corda dl cian, se l’á tut tles mans y é spo instës gnü trat fora dai compagns. Zënzater n intervënt nia da vignidé, sciöche ince n intervënt che lascia n sorí söla bocia – dantadöt pro la patrona che ê contënta da avëi indô le cian, mo ince pro i stödafüch, che á podü daidé te chësc caje davëi dër particolar.  (pablo)