La Usc di Ladins

L moment pior somea oramai passà, se taca a rejonèr de »Fase 2« ampò ence ti ultimes dis i dac ofiziai de la Provinzia de Trent seghita a moscèr neves caji te Fascia. L numer di enfeté te val l’é ormai ruà entorn ai 250, e demò te la setemèna dai 12 ai 19 de oril n’é stat registrà 34 de neves.

Ben segur endèna, per grazia, n’é ence n muie de varii, ampò no se pel amò arbassèr l livel de atenzion. Tel fin de setemèna passà i Polins de Fascia te si controi i à fermà no demò jent che jìa stroz zenza na bona rejon, ma ence jent en carantena, che no podessa proprio jir fora de cèsa per nesciuna rejon. Chest l’é dalbon pericolous e a livel normatif, aldelà de la denunzia de faus se te l’autozertificazion se declarea de no esser en carantena e dapò dai controi vegn fora che enveze se é te la listes, per esser ence la denunzia n muie più pesoca per sparpagnament de la malatìa.

Se i caji zerté te val da la Provinzia i é zirca 250, duc sà che en realtà chi che é rué en contat col virus i é tropes de più, ajache la rilevazion ofiziala tol ite demò chi che ge é stat fat l tampon o si familiares se i à sintomes. I dac a livel provinzièl disc che l tampon, che vegn fat ades en mesura maora, dèsc na perzentuèla de zirca l 7% de positives, ampò l pensier de tropes l’é che la rilevazion fata a Ortijei, che à moscià che beleche l 50% de la popolazion é ruèda a contat col virus, no l’aessa ejic trop desferenc te Fascia.

De più su La Usc stampèda de vender ai 24 de oril 2020.  (Lucia Gross)