La Usc di Ladins

L à inom »Na comunanza che educhea« e l é l nef percors del projet #Fuoricentro, che dal 2017 al 2021 l aea tout ite enc, istituzions e sociazions te Fascia e te etres teritories, col titol e l zil »Coltiviamo le periferie«. Chest projet, pissà da la Fondazion Trentina per l Volontariat Sozièl, CSV Trentino e i Servijes Istruzion e Politiches Sozièles de la Provinzia Autonoma de Trent, aea vent enlouta n bando nazionèl emportant metù fora da la firma sozièla »Con i Bambini« tel chèder del »Fondo per il contrasto alla povertà educativa«. 
Chest'outa l obietif l é chel de svilupèr na reflescion coletiva dintornvia l argoment de la Comunanzes che educhea e anter i atores che porta inant l projet te Val l é l Comun General de Fascia, la Scola Ladina, aministrazions, sociazions e etres sogec. Per envièr via la sperimentazion de metodologies inovatives de lurier spartì coi etres l é stat metù ju l »Pat educatif de Comunanza«, strument per portèr dant aleanzes e didèr a meter a jir na Comunanza che educhea, che la sie responsabola di bec e bezes e ascorta a la crescimonia positiva de duc e dutes. 
Per la prejentazion de chest Pat, ai 27 de mé la sala grana de la Sorastanza de la Scola Ladina de Fascia se à empienì de jent. A averjer la scontrèda desche patron de cèsa l é stat l Sorastant Federico Corradini, che l se à dit content de veder che se pel lurèr ensema, tolan ite joegn e gregn e fèr rei per l benstèr de noscia comunanza, te chest temp olache saon che l é ence fragilità, daperdut e ence anter i studenc.
Cipriana Tomaselli di Servijes Sozièi del Comun General de Fascia l'à rengrazià la Scola per sia desponibilità portan mingol de informazions sul projet #Fuoricentro e sul nef percors, nasciù dal Desch de confront e lurier ‘Alleanze educative’ che se aea metù adum aldò del Pian sozièl del CGF ‘Anteveder’.

Se pel lejer dut su La Usc nr 22 dai 13 de jugn: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.




 (Lucia Gross)