La Usc di Ladins

Con l’ann de stude nuef àn tla Università Liedia de Bulsan la poscibelté de lié damì n stude academich con la vita profescionala y privata. L retour prof. Alex Weissensteiner nes à splighé ciuldì che al vegn damané de podei studié a temp parzial y sun cie ofertes nueves che al vegn bele segn laoré.

Sciche an sà, é i laours a temp parzial dret damanés. Ciuldì vuelel pa ester ence n stude a temp parzial?
Alex Weissensteiner: Ajache n stude a temp plegn n’é per tres plu persones joenes nia la dreta formula. Cis tles materies MINT che an dij (matematica, informatica, scienzes naturales y tecnica), él bele encuei mec i assolvenc y assolventes dles scoles autes che ciapa ite diretamenter tl mond dl laour – olà che ai vegn cheris con pisc y con mans. Tl medem temp vedonse ence te nosc masters che trueps studenc fej n laour dlongia l stude y adora fina al 50 percent de si temp a desposizion.

Y per chest grup de persones vegnel pité dal ann che vegn na oferta plu flessibla?
Avisa. Nos volon ti permete a les persones da desfiré n stude con n ritm che se lascia lié ben con sia situazion de vita atuala. La rajon ne muessa nia ester n laour; al pò ence ester les oblianzes familiares o d’autres priorités de vita, che ne permet nia da fé n stude a temp plegn. Te n stude a temp parzial vegnel concretamenter smendrì da 60 a 30 i ponc ECTS per ann academich; aldò vegnel ence smendrì les tarifes de stude.

Duta la intervista podeise lieje sun la Plata Université, t’La Usc di Ladins di 13 de jugn