La Usc di Ladins

L coronavirus à ferà e mudà n muie de robes, anter chestes ence desvalives programes de Radio Studio Record, desche »l’aperitif« con la dediches de Biancarosa Florian e l »bel bondì ladin« de Monica Cigolla. Apontin chest program da vignidì, che l prum de oril, desche n burt »mat de oril« l’à cognù lascèr sù, à segnà chisc dis l cedean emportant de 15 egn de trasmiscions. Ge aon domanà a Monica che la ne conte vèlch de più de chest program e de sie empegn per la radio.

Monica, can e co éla nasciuda l’idea de far n program ogni dì a Radio Studio Record e perché proprio »N bel bondì ladin«?
L’é passà n bon pec de egn ma me l recorde desche se fossa ades. Te l’Union di Ladins se rejonaa de l’emportanza de tegnir sù l lengaz ladin e de l slariar fora anter la jent, no demò tras l sfoi La Usc di Ladins ma ence tras la radio, percheche chest strument l’é fondamental, apede a la televijion, percheche n lengaz no l vae perdù.

Canche rejone de radio me vegn semper tel ciaf Danilo Dezulian del Garber rechia che l dijea semper che aane besegn de n »sugeritor« per no perder noscia rejonada fasciana sćiantiva e con chela parola l’entenea proprio la radio.

Del 1999 l Comprenjorie ladin de Fascia aea sotescrit na convenzion con Radio Studio Record per la produzion de programes per ladin e chi egn l valutaa de utol smaorar chesta produzion col portar inant forme de colaborazion con autres sogec che se dajea jù tel ciamp de l’informazion, anter chisc l’Union di Ladins. Donca l’Union se pissaa a che vida che l’aessa podù smaorar la produzion de programes e, me recorde benon che proprio tu Lucia, tu me as domanà se aesse abù gust de far valch ence gio.

No me l’é fat dir doi oute. É pissà e pissà che sort de program che aesse podù far e, scutan autre radio, me é vegnù l’idea che fossa stat bel far na sort almanch con l sènt del dì e valch autra informazion apede. E coscita l’é nasciù »N bel bondì ladin«. La pruma trasmiscion é jita fora al prum de mé del 2005, l’era de domenia.

Podede lejer duta l'intervista su La Usc stampèda de vender ai 8 de mé 2020. 



 (Lucia Gross)