La Usc di Ladins

L minister per i Afares regionèi e la autonomìes Francesco Boccia à sotescrit angern l decret che nomina i raprejentanc del Goern nazionèl te la Comiscion di 12, l’organism paritetich olache vegn dezidù i passajes de competenzes anter Stat e Region e Provinzies autonomes, aldò de l’articol 107 del Statut de autonomìa.

La neva nomines à mudà fora belebon la composizion de l’organism, defat l Goern à mudà ben 5 di 6 inomes che era stac dezidui dal goern da dant vidà da Lega e 5 Steiles.

Tel Trentin al post di avocac vejins a la Lega, Maurizio Roat e Claudia Eccher, l’é stat nominà Geremia Gios e l’avocata fascèna Rosa Rizzi, che aea candidà con i 5 Steiles te l’ùltima litazions provinzièles e supletives. Ence te la provinzia de Busan l’é mudà i 3 componenc de nomina statala: al post de Michl Ebner, Antonio Lampis e Filippo Maturi sarà Luca Crisafulli, Esther Happacher e Antonino Ilacqua. L soul component confermà da Roma l’é Gianfranco Postal, jà dirigent provinzièl e conscidrà om de gran esperienza e competenza en cont de normes de atuazion.

Te la Comisicon di 12 resta i componenc de nomina locala, che no fenìa sie mandat: Fabio Scalet e Manfred Schullian nominé dal Consei regionèl, Franca Penasa e Ugo Rossi per l Trentin e Meinhart Durnwalder e Carlo Vettori per l Sudtirol.

La nomina de na ladina de Fascia te chesta emportanta Comiscion, te la encèria che era stata tel passà de Giuseppe Detomas vegn vardèda con sodesfazion e con atenzion dai ladins.

De più sun chest, con na intervista a l’avocata Rosa Rizzi, sarà da lejer su La Usc di Ladins stampèda en vener ai 17 de jené.

 (Lucia Gross)