La Usc di Ladins

L’é stat l’ultima radunanza del president BIM de la valèdes de la Veisc Armando Benedetti, chela de en vender ai 31 de jené te la neva scoles populères de Masi de Ciavaleis. Ultima percheche l’é a la fin de sie terzo mandat da president e dachelanvìa per statut no l pel più vegnir reconfermà. Per chest a la fin de la scontrèda l ge à tegnù a rengrazièr duc i raprejentanc che à tout pèrt a la radunanza per l lurier positif che l’é stat portà inant te chisc egn. 

A la prejenza de 20 raprejentanc di 27 comuns consorzié (Fiem, Fascia, Cembra, Piné e Primier Sèn Martin) del president del Consorzie Donato Preti e de la diretora Maria Comite, l’é stat portà dant l bilanz de previjion del Consorzie del 2020 e per i egn 2020-2022 che se sera sù su la soma de 77.507.751 euro che tol ite per la pruma outa ence i 50 milions de »Fondo Comune Interconsorziale Adige« gestì su delega di Consorzies sozié de Busan, Verona, Vicenza e Belun. L bilanz de previjion 2020 vegnarà aproà a la radunanza generèla chiamèda ite en mercol ai 26 de firé a Trent.

L bilanz de previjion del 2020 de la valèdes de la Veisc, prejentà tel detai dal president Benedetti ensema ai conseieres raprejentanc per Fascia Francesco Dellantonio Tasin e per Fiem Maria Bosin, se sera sù su la soma de 3.214.923 euro: de chisc 165.348 euro l’é chel che vegn deretorn dai mutui conzedui, 85.400 euro vegn da la metanisazion de la valèda de la Veisc (ex Avisio Energia) e 3.150.000 euro da sovracanone.

De più su La Usc stampèda de vwender ai 7 de firé 2020.  (Monica Cigolla)