La Usc di Ladins

L'Azienda Sanitera dl Südtirol fej a l savëi la cumpëida atualiseda di pazienc che se à tacà l coronavirus, y tantes che ie la carantenes a cësa y la vitimes.

L Lauratuere de Microbiologia y Virologia dl'Azienda Sanitera lëura inant cun dut l sgors per analisé i tests (tampons) dac ju. Da inier lunesc ai 23 de merz nchin a ncuei da duman iel unì analisà 537 tampons. De chisc ie 65 resultei positifs.

La cumpëida dla persones che se à tacà l coronavirus nuef ie cundechël jit su a 789.

De ndut iel nchin a ncuei merdi ai 24 de merz unì fat l test a 4.292 persones, che ie unides sometudes a 6.631 tests.

204 persones amaledes de Covid-19 vën curedes ti spediei. Oradechël iel ti spediei 66 caji de pazienc cun na nfezion suspeteda.

Tla terapies ntenscives di spediei dla provinzia vëniel curà 48 persones amaledes de Covid-19.

La cumpëida dla persones che se à tacà l coronavirus nuef y che à messù murì per cumplicazions che taca adum cun i sintoms dl Covid-19 ie mo avanà. Ncuei daduman ai 24 de merz iel unì cumpedà 9 vitimes nueves. De ndut ie la cumpëida dla persones mortes cun Covid-19 ruvà su a 44. Nce pra la 9 persones mortes danter inier y ncuei se tràtel de persones de tëmp che ova bele dant d’autra malaties. Al mumënt ie 2.365 persones n carantena a cësa.


I dac n curt:

Tests (tampons) analisei danter inier lunesc ai 23 de merz y ncuei daduman ai 24 de merz: 537

Tests positifs nchin ncuei daduman ai 24 de merz: 65

Cumpëida de duc i tests fac: 6.631

Cumpëida de duta la persones sometudes a n test: 4.292

Caji de persones che se à tacà lcoronavirus: 789

Pazienc cun Covid-19 curei ti reparc di spediei: 204

Pazienc cun Covid-19 curei tla terapia ntensciva: 48

Caji suspec n cura: 66

Vitimes da inier lunesc nchin a ncuei daduman ai 24 de merz: 9

Vitimes de ndut: 44

Persones n carantena: 2.365

La tabeles ala menuda cun la partizion aldò di chemuns di positifs y dla persones n carantena unirà fac a l savëi tosc.



FOTO:

L Lauratuere de Microbiologia y Virologia dl'Azienda Sanitera lëura inant cun dut l sgors per analisé i tests (tampons) dac ju (foto: pexels.com).