La Usc di Ladins

Intratan pé d’atres desposiziuns sigüdes:
al é gnü lauré fora n plann che se regolëia aladó dl de crujal 18 de ma 2020. Sce i mituns jará a scora en chël de, spo gnará i ejams fac fisicamënter – mo te na forma smendrida.
Sce i mituns ne jará cun chël de nia ciamó a scora y ará inant leziun a destanza te ciasa, ne sarál degun ejam por les scores mesanes, y la matura gnará fata te na forma a destanza tres la presentaziun de n laur dl candidat y n colloquium. I datais dl contignü dles döes opziuns dará fora Roma – sciöche al pé: ciamó incö!

Assessur Achammer: "N no tler a leziuns de scora d’isté"

Tla conferënza stampa dla Provinzia incö a Balsan á l’assessur Achammer dit tlermënter che arlungé la scora o ascorté les vacanzes estives por jí a scora denant n’é degun tema!

Programs di mituns y jogn d’isté

Ala domanda da pert de La Usc di Ladins: "Sarál pa bëgn l‘Isté Deboriada, le program de tëmp lëde y recreativité por mituns y jogn tla Val Badia coordiné dal Sorvisc ai Jogn Val Badia", á respognü l’assessur ladin Daniel Alfreider: "I sun tl laur da arjigné ca dötes les poscibilités da avié le program almanco en pert y te formes alternatives, en caje che i ne podarun nia le mëte a jí deplëgn!" Te chësta ocajiun ál rengrazié le SaJ Val Badia por le bun laur!  (Iaco Rigo)