La Usc di Ladins

Con l meis de aost del 2020 se à serà sù l’encèria de Sorastanta portèda dant per 14 egn da la professora Mirella Florian e a sie post l’istà passà l’é stat nominà, con regnèda demò per un an, l sostitut Sorastant te la persona de Claudio Valentini. Ence Valentini ampò l jirà en penscion con l meis de aost che vegn e la Provinzia autonoma de Trent, con chela de ge arsegurèr a la Scola de Fascia de poder jir inant a na vida stabola e segura, la se à endrezà chest’outa a meter a jir n concors per dèr sù la direzion de la Scola de Fascia per n temp de 5 egn, che pel vegnir renové demò per n’outa.
Tel bando de concors, aproà da la Jonta provinzièla te sia scontrèda en vender ai 5 de firé, l’é pervedù che vegne valutà i titoi e fat doi proes de ejam a ousc.
La domana per tor pèrt cogn vegnir fata online dal portal »Vivoscuola« (www.vivoscuola.it) sezion Concorsc e l’é temp 30 dis dò la data de publicazion sul Boletin de la Region Trentin Sudtirol. Sul medemo portal vegnarà dapò dat duta la informazions sul dì e l lech olache vegnarà metù a jir la proes.
Dant de vegnir tout sù l candidat che venc l cognarà fèr n tirocinie de n meis te la Scola de Fascia e n cors de formazion.