La Usc di Ladins

Sarà endò na ela, e chest’outa na ladina, la diretora de la Fondazion Dolomites Unesco. 

Mara Nemela da Cianacei e la é stata nominèda ai 3 de mé a Belun dal Consei de Aministrazion de la Fondazion per tor l post de Marcella Morandini, che l’an passà aea dat jù sia demiscions da chesta encèria.

La enjegnera fascèna, che era responsabola de la Rei de la Resserves del Comun general de Fascia, é stata cernuda per chesta encèria dassen emportanta anter la trei eles che aea passà la selezions, dutes trei, à dit i component del CdA, de aut profil.
Sia competenza ge à dat l met de arjonjer na gran profescionalità a livel interdisciplinèr e na cognoscenza del teritorie, apede che na bona esperienza tel dialogh e la soluzion di conflic.

»Lurèr per la Fondazion per me vel dir se meter al servije de n sistem teritorièl comples, vardan de didèr l dialogh e l confront« à dit Mara Nemela dò sia nomina.

De più su La Usc stampèda de vender ai 7 de mé.  (lg)