La Usc di Ladins

‘Surplus’ l é l titol che ge é stat dat a la 5^ edizion del Simposie Toni Gross, e dassen chest’outa l event à responet al tem, svilupan l conzet de surplus: percheche tel zipièr, per tor fora l’ènema dal legn ge vel semper tor demez che che l é ‘de massa’; percheche per fèr sia operes i artisć à durà ence elemenc de scart, vèlch che per zachei de etres l era ‘de massa’ e i aea trat demez e che à ciapà na neva vita; ma soraldut percheche chesta neva formula é stat bona de ge dèr dalbon n ‘surplus’ desche valor de più, sorafora la proponeta de zipièr tel segnificat più tradizionèl de la parola.

L’idea de »sperimentèr, ajache l simposie l é fat proprio per passèr via i ores de la comfort zone del classich simposie su legn, per se dèr ju te n mescedoz anter èrt visuala e musega« é nasciuda da Pierangelo Giacomuzzi, chiamà acà pec meisc dai organisadores (Union di Ladins, Scola de Fascia e Comun de Sèn Jan) al ruol de diretor artistich del Simposie.
L é stat el a cerner fora i partezipanc, e l à metù ensema la 4 cobies che dai 12 ai 16 de setember les à lurà per sia realisazions de èrt e sons te piaz: l badiot Tobias Tavella e l pascionà de sperimentazions sonores Peter Kompripiotr Holznecht; la zipiadora Arianna Gasperina e l musizist badiot Max Castlunger; i performers da Milan e Urbino Guglielmo Bevilacqua e Giorgia Marchetti e Markus Gasser che fèsc flauc e l scultor Gianluigi Zeni.
L Simposie se à serà su en vender domesdì te tendon de Poza, olache i partezipanc à podù ge dèr ousc ai strumenc realisé fora per la setemèna col didament de la sociazion La Grenz per la pèrt tecnica, se prejentèr e portèr dant sia esperienza de partezipazion e sia operes.
L é stat dalbon n bel suzes.

De più su La Usc stampèda de vender ai 23 de setember.  (Lucia Gross)