La Usc di Ladins

L’urt de scolina da Rina â davëi n gran debojëgn da gní ressané, y ince sce ara á doré n pez, pón dí che al á paié la mëia da aspeté. Da d’altonn incá é l’urt nü a desposiziun di mëndri dl pice paisc sot Col dla Vedla. Ci che manciâ ciamó, ê la inaudaziun y benedisciun y chësta é garatada en jöbia ai 24 d’aurí. Scebëgn che le cil ê grisc y che al orô ince ester assosta y les ambreles impiades, él sté i mëndri – chi dla scolina cun chi dla elementara – che á ponsé da porté ite corú y buna löna, insciö che al é garaté na festa plajora y da orëi bun. La coordinadëssa dles scolines de Mareo Elisabeth Miribung á podü saludé danter i ghesć le ploan siur Klaus Sottsas, l’ispeturia y direturia dles scolines ladines Jenny Ploner, i aministradus dla legislatöra passada cun l’Ombolt Felix Ploner y i assessurs Ludwig Rindler, Pepi Tasser y Paul Pisching, n valgügn geniturs, deplü rapresentanc dles dites che á lauré y le proietant Philip Stauder.
Rodunt Stauder ti á dé a chësc proiet n tonn particolar. Chël dla scolina da Rina n’é nia n urt sciöche düc i atri, olache an ciafa n gröm de blëites y raites "prefabricades". Al é gnü realisé aladô dla filosofia dla geomanzia, olache al vëgn lascé lerch ai materiai dla natöra, olache al vëgn tigní cunt ince di flusc de energia – por ti pité ai mëndri dantadöt n post da sté saurí y da porvé fora.

Deplü sön la festa podëise lí t’La Usc di Ladins di 9 de ma  (pablo)