La Usc di Ladins

Cun n candidat da ombolt su y döes listes de candidac por le Consëi, é i zitadins dl Comun de Badia jüs ales urnes en domënia ai 4 de ma. Na gran desfarënzia, sce an pënsa al’alternativa pitada pro les lîtes dl 2020, canche an â podü chirí fora danter 4 listes y 3 candidac da ombolt.

L’avocat Christian Pedevilla, che â bele candidé da ombolt dl 2020 a ce dla »Lista Zivica por düc«, á e chësc iade ciafé la crëta dla jënt cun süa lista »Badia-La Ila­-San Ciascian«, arjunjon le 52,1% dles usc, cun 959 preferënzes.
»I sun dër contënt dl resultat y da avëi arjunt le 52% dles usc sciöche pröm zitadin. La crëta y les usc s’á tripliché, sce an mët a confrunt les usc ch’i â ciafé dales lîtes dl 2020. Manco bel é le numer dles zetoles nia varëntes, che s’á alzé y é tomé fora valgamia alt«, dij Christian Pedevilla.

Teco é stades les zetoles nia varëntes cotantes: bëgn 883, tan co le 47,9% dles usc, y de chëstes n’él gnü dé jö 545 de blances. L’avocat Christian Pedevilla iustifichëia: »Sambëgn che cun ma un n candidat da ombolt y la mancianza de alternatives, pól gní a s’al dé deplü zetoles blances. Al é ince sté na mëndra partezipaziun, gaujada en pert dal fat che tröpa jënt ê te chësta data demez por vacanza y ince deache cun pücia alternativa é l’interes da lité mënder«.


Deplü da lí, ci co reverda i resultac dles lîtes comunales 2025, ciafëise tla ediziun nöia da incö, vëndres ai 9 de ma!