La Usc di Ladins

L é da 4 meisc, avisa dai 26 del meis de messèl passà, che te duta la pèrt trentina de la Marmolèda, su e su dal lech de Fedaa, l é descomanà l azes. La ordenanza del Comun de Cianacei era ruèda do l gran destach de giacia di 3 de messèl che sun Marmolèda aea caujà 11 vitimes e aldò de la relazion del Servije per la prevenzion di risesc del Departiment Protezion Zivila de la Provinzia de Trent, che col gran ciaut del istà aea palesà l risech de etres evenc che aessa podù meter en pericol la jent. 

L’ordenanza, emponuda sessaben da rejons de segureza, à caujà n gran dan ai operatores del Fedaa, che i sperèa che la posse vegnir touta demez inant la fin del istà, ampò l ciaut fora da la norma che à abù regnèda enscin chisc dis passé no lo à permetù.

Demò ai 16 de november, ence aldò de la prescions di impiantisć del Venet che se enjigna a orir ai 3 de dezember, l Departiment de Protezion zivila de la PAT à manà fora na relazion che smendra l raion conscidrà de gran pericol sul giacé. Chesta relazion defenesc amò desche raion de pericol la pèrt auta olache l é stat l destach e doi lenghes che va ju envers l lech.

De più su La Usc stampèda de vender ai 25 de november.  (Lucia Gross)