La Usc di Ladins

Ai 12 de november l é stat na data emportanta per la stampa regionèla. No demò La Usc di Ladins, defat, à festejà sie cedean de 50 egn, ma del 1972, an del secondo Statut de Autonomia, ence l Orden di giornalisć del Trentin Südtirol se destachèa dal Venet per meter su n Orden regionèl autonom. 

Per chest l é stat endrezà doi dis de evenc a Trent, peé via jà en vender ai 11 con la premiazion di più veies e di più joegn scric ite. 

La presidenta del Orden regionèl Elisabeth Anna Mair à volù te chesta ocajion uzèr fora l’emportanza de na dreta informazion, n valor che l é ence presidie sozièl e democratich. Per chest te Piaza Dante a Trent, dedant a la senta de la Region, l é stat inaudà na banca che vel simbolisèr la libertà de esprescion. 

Per la pèrt storica ge é stat lascià lèrga ai intervenc de duc trei i gropes linguistics: per chel talian à rejonà Giacomo Santini, per chel todesch Hansjörg Kucera e per chel ladin la giornalista fascèna de Rai Ladinia Margherita Detomas, che é scrita ite al Orden dal 1993 e dal 1998 al 2014 l’à fat pèrt del Consei del Orden regionèl Trentin Südtirol.

Margherita Detomas à rengrazià del envit e l’à portà sie salut ence per ladin, a inom de duc i coleghes che opera ti media ladins.

De più su La Usc stampèda de vender ai 25 de november.   (Lucia Gross)