La Usc di Ladins

L Museo Ladin de Fascia se verteea per na festa de la femena dalbon fora de anter. En mercol ai 8 de mèrz, da les 17:30, l se entenc de resa per n fin unich e originèl: la prejentazion de la neva linea de tasces, prossaches, sciatui e portalapijes e metuda fora ensema coi prodoc locai del projet »Alimentare Cultura«. Doi ejempies de produzion locala che va ensema per ge voler ben a sia tera. 

Via per l 2022 la Majon di Fascegn à portà inant na campagna identitèra coi banners aiegres e da color nasciui dai dessegnes del concors »L segnaliber che volesse« endrezà da la Biblioteca Ladina Père Frumenzio Ghetta. Ades chisc banners à ciapà na vita neva deventan toc unics che vegnirà venui te Museo Ladin. Se trata de na produzion REDO: ogne toch l é stat confezionà biot a man tel Trentin e l é caraterisà da garanzies ecezionèles de sostegniboltà e de tegnuda, dut personalisà ‘Majon di Fascegn’. 

Él fosc na ocajion miora che i 8 de mèrz, festa de la femena, per portèr dant la neva, sporjan na idea per n don alternatif? 

E se a chesta neva se met apede la oportunità de n ‘aperitif a km 0’ tel chèder de la colaborazion del Museo col projet »Alimentare Cultura«, dut doventa amò più enteressant e golous.

Na ocajion saorida, donca, per fèr o se fèr n don, do l lonch troi de »L Segnaliber che volesse«, per cognoscer per la pruma outa l Museo o l vijitèr endodanef, per sostegnir la produzion a km 0 de noscia firmes del post e chiamèr per n aperitif, no demò al feminin. 

De più su La Usc stampèda de vender ai 3 de mèrz.