La Usc di Ladins

"Y sce i provassen da fé n liber per piceres y pici, con n boton che fej veres, ma deberieda con les autres valedes?", se damanova l consei dla Uniun Ladins Val Badia (ULVB) dl 2021. L travert fova chest: crié na publicazion inedita, con elemenc che lieia les valedes ladines, ilustrazions fates da n’artista locala y paroles te vigni idiom encer dl grup dl Sela. Na idea che ti plajova ence a les unions dles valedes ladines vejines, che à atira azeté da laoré adum. Enscì s’à formé n bel grup de laour joen y creatif, metù adum da Elisa Mangutsch, Michael Moling, Milly Crepaz, Melissa Locatin y Anna Laimer, che s’à atira dé ju con idees desvalives.
Pro chesta publicazion per l’eté dai 6 meisc ensù, é vigni detai vegnù curé aldò de deplù aspec. Un é samben chel dla sostenibelté di materiai y dl laour che é resté tla provinzia. N secont aspet reverda l contegnù dal pont de veduda pedagogich: la storia rejona de tiers che vif te nosc bosc, ilustrés da Johanna Kostner con colours a ega. Nia enultima él da auzé fora l aspet interladin, nasciù da na colaborazion anter les valedes encer l Sela via.

Deplù podeise lieje t’La Usc di Ladins di 17 de merz  (Marianna Kastlunger/pablo)