La Usc di Ladins

La parora "phoné" vëgn dal grech antich y ó dí "usc". Chësc sostantif é ince le cör y le sëns dl moto de chësc proiet europeich che abracëia bëgn ot mendranzes linguistiches da plü ciantuns d’Europa: "giving minority languages a voice" (ti dé na usc ai pici lingac). Le proiet á desco fin le mantegnimënt y la promoziun culturala y linguistica desferënta te Europa, al ó lié adöm porsones che ciara sura sü confins de so lingaz fora y ó porté so lingaz te n contest y referimënt internazional. "I lingac é i veicui de nostes cultures, de nosc recort coletif y nüsc valurs. I lingac é na componënta essenziala de nostes identités, y n elemënt costittutif de nosta diversité y de nosc patrimone vi." Perde n lingaz n’ó nia ma dí perde n elemënt dla comunicaziun, mo bëgn na pert portanta de n sistem dles conescënzes svilupades tl tëmp.

Le teater desco comunicaziun popolara
La leteratöra á na funziun essenziala tl mantegnimënt de n lingaz, dantadöt chël de mendranza che n’á nia tan n gran potenzial de media sciöche la televijiun, le radio, i socials, yiii. Leteratöra pó gní partida fora cun libri o stromënc tecnologics plü moderns; la forma tradizionala plü via dla leteratöra é le teater popolar, ajache i personaji, i posć y i dialogs (i monologs) ciafa vita desco tla cuotidianeité y ti fac reai. Le teater á lapró n gröm de poscibilités da comuniché cun le publich, y ince da dialoghé cun le publich, les sorts de teater é aldedaincö tröpes y tres ciamó plënes de novités y formes nöies.
Le proiet "phoné", porté inant da ot teatri fora por l’Europa y da plü istituziuns desco universités (por la traduziun, yii.), se tol dant nia ma da scrí, mëte en pe y jobelné teatri de mendranza nüs, al ó ince ti dé na visibilité tlera sön paladines europeiches importantes, y ince trasmëte chëstes realtés dles mendranzes sön plataformes tecnologiches importantes cun podcasts, vodcasts y ince registraziuns de intervistes dal vi.
I contribuc scric, registrá a usc (ince cun video) y publicá al intern dl proiet é düc ti liingac originai de mendranza y spligá por inglesc desco "lingua franca" danter düc i players.

Liéde inant deplü tla ediziun atuala de La Usc di Ladins, gnüda fora inier!