La Usc di Ladins

L gran teater de Navalge l era beleche pien en vender ai 5 de mé per l conzert de la operes del Canori, e tel jir de la sera no l é mencià i momenc de comozion.

Tel chèder de l’Aisciuda Ladina l é stat prejentà l frut de n lonch lurier che é peà via amò jai egn tel Istitut Cultural Ladin, che à domanà la colaborazion de la Scola de Musega Il Pentagramma. 

L president de chesta Scola, Stefano Lazzer, che à prejentà con braura duta la sera, l à recordà che l’idea era peèda via da Fabio Chiocchetti, enlouta diretor, e la é jita inant con la diretora da ades Sabrina Rasom. Do aer didà a informatisèr la partidures scrites a man dal Canori per l liber »Cianties da mont, da spas e dal cör«, vegnù fora del 2020, al Pentagramma ge é stat proponet de portèr dant te n conzert chisc toc, che en pèrt é stac registré ence dal Quartet Demò Ousc che tol ite Martin Bernard, Luisa Chenetti, Angela Chiocchetti e Stefano Volcan.

Apontin chest quartet à avert en vender passà l conzert a Moena con la cianties ‘El Rociador’, ‘Colm de luna’ e ‘Valzer Moena’, che sche duc i moenac i cognosc e i cianta, e che les à ciapà na viesta neva col compagnament de l’orchestra del Pentagramma e l’orchestrazion del maester Ivan Marini, che l é stat domanà dal Pentagramma per chest bel projet e l à portà su la paladina del Navalge doi toc en pruma assoluta.

De più su La Usc stampèda de vender ai 12 de mé.  (Lucia Gross)